Home » Taho Sa Kahimtang Sa Lungsod Sa Trinidad (State of the Town Address)

Taho Sa Kahimtang Sa Lungsod Sa Trinidad (State of the Town Address)

sota

Delivered by the Mayor during the 68th Town Anniversary celebration of the Municipality of Trinidad on September 01, 2015.

Akong pagyukbo sa atong buotan ug kugihan nga Gobernador Edgar Chatto, Bise Gobernador Conching Lim, Board Member Gerry Garcia, Vice Mayor Frank Gonzales, mga sakop Konseho sa Lungsod, mga Kapitanes, mga Magtutudlo, mga opisyales sa Barangay ug kaninyong tanan nga mabuot nga katawhang Trinidadnon, maayong buntag!

Sa dakong pagpa-ubos tugoti ako nga motaho kaningyong mga mabuot nga lungsoranon unsa ang kahimtang  ug ang-ang sa kalamboan sa atong lungsod sa Trinidad ubos sa pagdumala niining inyong Alagad, Higala ug Mayor nga nahimong kabahin sa kasaysayan ug paglambo sa atong lungsod. Alang kanako wala nay lain pang angayng buhaton kon dili paghatag kaninyo og husay unsa na ug hain na ang Trinidad karon sa natad sa kalamboan, kalamboan nga maoy damgo ug pangandoy sa tanan nga makab-ot.

Gibati ko nga ako isip inyong gipili nga mayor sa makaduhang higayon niadtong 2007-2010 ug sa 2013 hangtod sa 2016 adunay kaakuhan nga sayran ang mga lumolopyo sa kahimtang sa Trinidad tungod kay kamo misalig ug mitoo man nga ako adunay kakayahan, kasibot, kamatinud-anon ug tinooray nga gugma sa pag-alagad kaninyong mga katawhan, Gani mao pa kini ang unang higayon nga ang usa ka taho sa kahimtang sa lungsod kon “State of the Town Address” gihimo sa usa mayor sa kasaysayan sa Trinidad.

Unsa ba ang Trinidad kaniadtong mga nanglabayn’g panahon sa wala pa molingkod kining ubos ninyong igsoon? Ug unsa na usab ang Trinidad karon sa bag-ong panahon ubos ning kasamtangan nga administrasyon? Kuyogi ako ninyo sulod sa pipila ka gutlo ug atong tan-awon ang kalainan sa kaniadto ug karon. Tingali sa mga edad-edaran na nga naka-abot sa maong mga panahon ug sa mga bayong-bayong  ning ulahing mga katuigan sa wala pa ang Cajes-Gonzales Administration, maka-ingon gayod nga  ang Trinidad usa ka maluyahon, kulang sa kadasig, mingaw, kabos ug ulahi sa kalamboan nga klase sa lungsod ning amihanang bahin sa lalawigan sa Bohol.

1. Ang Merkado kaniadto gubot ug hugaw tan-awon tungod kay walay hipno nga pagpahiluna sa mga pwesto sa pagpamaligya nga sama sa lamasan, tubaan, buwaran ug dry goods section, karon kini nahapsay na tungod kay atong gipahiluna nga hapsay, maanindot ug limpyo tan-awon. Sa dili madugay sugdan na usab ang pagtukod sa Dos Andanas nga annex building sa atong Mercado Publiko tapad sa luna nga gi-okopahan karon sa isda-an ug karnehan ug niining umaabot nga bag-ong building usahon na ang lamasan, isdaan, karnehan ug buwaran  nga ipahimutang sa ground floor  og sa mga grocery outlets sa ikaduhang andana.

2. Ang balay-lungsod kon Munisipyo sa Trinidad kanhi gamay kaayo, piot ug daw walay atiman nga unta usa man kini ka edipisyo nga nag-simbolo sa pagdumala, pagpahiluna ug pagpaseguro nga ang maayong serbisyo makab-ot ug mahatag gayod ngadto sa atong mga katawhan. Karon atong gipabarog ang dako, hamugaway, moderno, maanyag ug maanindot nga Munisipyo nga ang matag usa kanato maka-pasegarbo gayod tungod kay kini usa sa mga maanindot o ba kaha pinakanindot nga munisipyo sa amihanang bahin sa Bohol. Kong atong mahinumduman, ang luna diin ang atong kasamtangang Munisipyo mibarog, gipanag-iya sa pamilyang Rosales diin ang “round house”kanhi naka hatag ug pagsalipod sa atong daan nga munisipyo. Dugay ang panahon nga gipaabot sa mga katawhan nga unta makombinsi sa mga naunang pamono-an ang tag-iya sa luna ug sa maong balay nga round house aron unta kini mabalhin sa lain nga luna o ba kaha mapalit aron gayod makita ang view sa atong munisipyo apan wala kini nila mahimo tungod ba kaha kay wala nila hatagi og unang prayoridad o ba kaha kulang sila sa pamaagi og determinasyon nga kini maangkon sa atong lungsod.

Sa dihang inyo akong gisaligan ug gituboy nga mamahimong mayor sa atong lungsod kaniadtong 2007 hangtod 2010 sa akong unang termino, usa sa akong unang gihatagan og pagtagad mao gayod ang pag-angkon sa luna diin ang “round house” nahimutang pinaagi sa subsob nga negosasyon tali ni Madam Boning Rosales Woolmer nga usa ka malamposon ug arangan nga Trinidadnon nga naka base na sa Canada sulod sa dugay na nga panahon. Sa kaduyan sa atong gihimong mapa-ubsanon ug mapailobon nga paghangyo kaniya, siya misugot ra gayod nga ang luna iyang ibaligya sa lungsod sa kantidad nga Uno punto singko Milyones ka pesos (P 1.5 Million) lamang bisan og wala na siya magkinahanglan pa sa salapi tungod sa bahandi nga iyang naangkon. Dili gayod unta siya mosugot nga ang maong luna ug balay iyang pagabuhi-an tungod sa sentimental value niini isip kabilin sa iyang mga ginikanan ug tungod usab kay ang maong luna usa ka prime lot kansang bili momahal pag-ayo sa umaabot nga mga katuigan, apan tungod kay ato man siyang nakombinsi sa ngalan sa kalamboan sa mahal tang lungsod ang luna ato ra gayong naangkon ug karon mao na ang nahimutangan sa atong bag-ong Munisipyo.

3. Ang daan ug gamay nga munisipyo kanhi karon maanindot ug matahom na nga sama na usab sa kalidad sa atong bag-ong Munisipyo diin ang kantidad nga napahat niini gikan sa nasudnong kagamhanan uban sa pag-abag sa kagamhanan sa probinsiya pinaagi sa Bohol Earthquake Assistance Fund mikabat og 10 milyones ka pesos apil na ang extension office sa ikaduhang andana sa bag-ong munisipyo nga nahimutang sa likod nga bahin niini. Kini paga-blessingan ug i- tunol na sa contractor ngadto local nga pangagamhanan pinaagi sa simpleng turn-over ceremony uban sa atong Gobernador, Bise Gobernador ug ubang kadagkoan sa Probinsya ug sa DILG human sa akong taho kon State of the Town Address nga mosunod sa dili madugay. Kon kini formal na nga ma-turn-over, ang daan nga Munisipyo nga karon nahimo nang bag-o nga Edipisyo mao na kini ang pwesto alang sa mga opisinang national nga sama sa Municipal Circuit Trial Court, DAR, BIR, COMELEC ug uban pa.

4. Sa Sector sa Edukasyon, ang Trinidad Municipal College nga kanhi usa ka gamay ug dili ilado nga koleheyo diin duna lamay 200 kapin ka mga estudyante ug pipila lamang ka mga magtutudlo ug mga classrooms ug daan nga mga pasilidad, karon usa na sa dako ug inila nga tulonghaang koleheyo dili lamang dinhi nga bahin sa Bohol kong dili sa kinatibuk-ang probinsya tungod kay kini nakamogna og mga malamposong graduado og professionals sa nagka-daiyang mga kurso nga gitudlo niini. Gani sa pasulit alang sa mga magtutudlo (Teachers’ Licensure Exams) sa miaging tuig 2014 ang mga examinees sa TMC nakakuha og taas nga percentage nga dili malupigan sa mga dagkong unibersidad ug koleheyo sa Bohol. Sa Bachelor of Science in Secondary Education, nakakuha og 72.22%  o 13 sa 18 ka mga examinees ang nakapasar nga ang national average duna lamay 35.70 % ug sa Bachelor in Elementary Education nakuha og 94.7% diin ang national average niini duna lamay 34.40% .

Tungod sa maong performance kini piho gayod nga maoy hinungdan nga misulbong og samot ang enrolment sa TMC nga karon miabot na og 3,270 ka mga estudyante nga gani tungod sa kadaghan sa mga estudyante, pagkakaron adunay mga klase ang gihimo sa tennis court samtang gipaabot pa ang paghuman sa dugang mga classrooms nga hapit na ma-completo.

Gikan sa dyutay lamang nga Faculty members  ug dyotay nga mga classrooms karon duna nay 97 ka bo-ok Faculty members ug 99 ka classrooms apil na ang makeshift classrooms og  hapit na malibot ang tibook Campus sa TMC tungod sa pundo nga atong nadawat gikan sa Performance Challenge Fund sa DILG sa kantidad nga 1 ka milyon isip atong ganti sa Seal of Good Housekeeping sa tuig 2013 diin kita usa sa mga lungsod nga naila sa maayong pagdumala ug ingon man ang pundo gikan sa kagamhanang Probinsyal sa kantidad nga Uno Punto Singko Milyones ka Pesos (1.5M) pinaagi sa atong buotan ug mapinanggaong Gobernador Edgar Chatto. Namalit usab kita og mga ang modernong ekipo ug pasilidad ug ingon ang pagkontrata og Computerized Systems alang sa kasayon sa mga estudyante sama sa Computerized Enrolment System ug Computerized Billing System. Ang TMC tungod sa maayong pagdumala ubos sa pagpangulo ni Atty. Roberto C. Cajes kanhi Congressman ug kanhi Mayor sa lungsod Trinidad isip maoy School Administrator, ang TMC mao karon ang Numero Uno nga income generator sa atong lungsod diin sa 2014 mihatag og limpyo nga kita sa atong panudlanan nga mikabat og PhP 11,480, 595.23. Sa pagka karon gikan sa pipila lamang ka mga kurso kanhi, ang TMC duna nay 13 ka mga kurso nga gi-offer og puhon tingali kita mopuno og mga kurso nga sama sa BSHRM ug uban pa nga in-demand sa atong panahon karon. Kining tanan nakab-ot sa TMC bisan pa man nga kining maong tunghaan mao ang adunay pinaka-ubos nga balayronon sa matrikula sa tanang tunghaan sa tibuok lalawigang Bol-anon.

5. Sa Sector sa Pangalawas, Ang atong Municipal Health Center nga kanhi usab gamay ug piot kaayo, kulang sa mga kawani, kahimanan, pasilidad ug mga tambal, karon ato nang napalapdan, gisangkapan sa mga kahimanan, tambal ug mga ekipo ug gipon-an sa mga kawani aron ato gayod nga mahatag ang maayong serbisyong panglawas ngadto sa mga katawhan hilabi sa mga kabos ug mga tigulang. Sa akong paglingkod isip inyong mayor atong gipalapdan ang atong Health Center ug gipabarog ang Municipal Birthing Clinic pinaagi sa Fund Allocation nga atong nadawat gikan sa DOH sa kantidad nga mikabat og 4 milyones sa tuig 2007 ug tuig 2013.

Ang pagpalapad sa consultation ug waiting areas sa atong Health Center maoy hinungdan nga kita maka-tubag na sa daghang mga pasyente nga adunay average nga gidaghanon 60 ka mga pasyente matag adlaw nga atong naserbisyohan gikan sa Lunes hangtod sa Byernes sukad pa sa tuig 2009. Ang pagpabarog usab sa Birthing Clinic gitumong aron sa paghatag og luwas nga pagpanganak sa mga inahan ug luwas nga kahimtang sa mga batang gisabak aron malikayan ang insedente sa pagkamatay sa inahan ug sa anak tungod sa maternal delivery.

Gikan sa tuig 2010 hangtod karong tuiga dili mominos sa 1,200 na ka mga inahan ang naserbisyohan sa atong Birthing Clinic sa kubos kaayo nga balayranan sa paggamit niini apil  ang libreng tambal alang sa inahan ug bakuna alang sa batang gianak.  Ato usab nga gi-renovate and TB-DOTS Room and Laboratory sa kantidad nga PhP335, 000.00 gikan sa pundo sa DOH ug sa atong local nga panudlanan aron ato gayod nga ma-monitor kadtong mga pasyente nga gitaptan og sakit nga TB.

Aron matubag gayod nato ang tanang aspeto sa panginhanglan sa panglawas sa katawhan ug paglikay sa mga sakit, ang lungsod uban sa ayoda sa National ug probinsyal nga pangagamhanan mipondo og kinatibuk-ang PHP28,299,700.00 gikan sa tuig 2008-2015. Ug ang PHP 13,806,000.00 niini gikan sa lungsod  alang sa Barangay Outreach Program, Balay sa Nutrition, Municipal Nutrition Program, Basic Health Program nga naa ang libreng konsultasyon ug tambal, bakuna vitamin ug uban pa , Improvement sa Health Center ug PHILHEALTH sa mga indigents nga dunay budget nga PHP 4,900,100.00. Ug PHP 14,493,600.00 gikan sa DOH, DSWD, Opisina ni kanhi Sen. Migs Zubiri ug sa probinsya alang sa Salintubig Project, Birhting Clinic, Supplemental ug Milk Feeding ug health Nutrition Program.

Tungod usab sa igon-igong manpower sa atong Health Center diin duna kitay 1 ka Doctor, 1 ka dentist, 11 ka Nurse, 8 ka Midwives, 1 sanitary Inspector, 158 ka Barangay Health Workers, 20 ka Barangay Nutrition Scholars, 127 ka Community health Team Partners, 1 Health Aide ug usa ka Utility Worker, atong napaseguro nga ang atong Serbisyong Panglawas miabot gayod ngadto sa tanang suok sa 20 ka Barangay sa atong lungsod.

Sa walay duha-duha ang atong mga katawhan nakasinati ug nakatagamtam sa tanang mga Serbiyong Panglawas nga atong gipahimutang pag-ayo ubos sa atong pamuno-an.

6.Sa Agrikultura, Ang atong Demo Farm nga kanhi kulang sa mga kahimanan ug pasilidad ug kulang sa mga tanom nga daw dili nato matawag nga usa ka demonstration farm, karon nindot ug daghan na kaayong mga tanom nga sama sa mga utanon, duma, mais, humay ug uban pa.Niining tuig 2015, 4,000 na ka mga pamilya ang atong na-serbisyohan, 40 ka bags nga binhi sa humay ug mais , 1,540 ka pakete sa binhi sa mga utanon ang nahatag ug 154 ka mga kabaw ug baka ang napa-alimahan. Gipahingusgan usab nato ang suporta alang sa Crops Production, Livestock and Poultry Production, Fishery ug Aqua Production ug Extension Services ug uban

Ang atong Agriculture Office andam nga motubag sa inyong mga problema sa sakit sa tanom ug mga kahayopan diha-diha dayon tungod kay duna kitay mga kawani nga atong gi-assign alang niining maong mga panginahanglan.

Gikan sa tuig 2008 hangtod karon 2015 ang total investment sa Lungsod apil ang ayoda sa Department of Agriculture alang sa Agricultural Production, Farm equipment sama sa Tractor, Post-Harvest Facilities, Farm to Market Roads, Construction sa mga Green Houses ug renovation sa atong Demo Farm Building mikabat na og PHP 30,732,089.00 ka pesos.

A.) SA SEKTOR NGA INSTITUTIONAL, SOCIAL UG ECONOMIC DEVELOPMENT :

Ang Munisipyo ubos akong pagdumala nakapondo na sa na-kompleto ug nagpadayon nga mga proyekto ug programa sa kinatibuk-ang kantidad nga Php 20, 959,286.00 gikan sa tuig 2008 hangtod karong tuiga 2015 nga naglangkob sa Barangay Out Reach Program, CLUP, FLUP, LAMP II, Public Land Titling, NRM Management, Students’ Summer Job, Assistance to Indigent Families ug Senior Citizens, Kabataan, Persons with Disability ug uban pa.

Sa LAMP II Project diin kita gi-abagan og Financial ug teknikal nga suporta gikan sa DENR pinaagi sa atong Assessor’s Office kita nakahatg og 4,470 ka libreng patent application para sa  pagpa-titulo sa yuta diin 3,863 ka mga titulo na ang atong naapod-apod ug ang uban anaa sa Register of Deeds. Kong kanhi adunay kasamok ug walay kasegurohan sa yuta, karon tungod sa programa naka-angkon na og kalinaw ug kahusay ang mga tag-iya sa mga yuta.

Sa kabataan,  adunay 729 ka Day Care Pupils nga naka-benipisyo sa Supplemental Feeding ug 810 ka mga bata ang naka-paahimolos Milk Feeding pinaagi sa atong MSWD Office. Ang Trinidad aduna usay 2,071 ka mga Pantawid benificiaries ug 455 ka LGU-sponsored PHILHEALTH members.

Sa Assistance to Indigent Families (tabang sa mga kabos) mikabat na og PhP 3,150,000.00 para sa ilang medical ug cash assistance ug sa atong mga pinangga ug gitahod nga mga Senior Citizens mikabat na usab og PhP 2,435,000.00 alang sa ilang birthday gift nga tag PhP 500.00 matag usa/ matag tuig alang sa dul-an og 1 ka libo ka mga senior citizens sa atong lungsod.

Ato kining ika-pasegarbo kay kita nakahimo niini nga programa nga usa ka gamay nga lungsod kong itandi sa mga dagkong lungsod nga atong silingan nga karon wala pa tingali ingon niini nga programa ug pondo alang sa ilang mga senior citizens ug indigent families.

Sa Summer Job alang sa mga Kabatan-onan nga High School ug College ang lungsod gikan sa 2008 hangtod sa 2015 nakagahin og PHP 1,425,000.00

Ang atong Munisipyo usab pinaagi sa atong opisina sa Civil Registrar naka-sponsor usab og  libre nag kasal sa 356 ka mga paresan og 161 nga libreng registration gikan sa tuig 2009 ug 2015.

B. PONDONG PINANSYAL ALANG SA MGA BARANGAY KON (FINANCIAL ASSISTANCE TO BARANGAYS /BARANGAY AID)

Ang lungsod gikan sa 2008 hangtod karon 2015, naka- release na og PhP 20,636,688.00 ka pesos alang sa mga Livelihood Programs sa mga People’s Organizations, Maintenance sa mga Barangay Roads sa Agrarian Communities, Barangay Development Projects, Incentives sa mga BHWs ug mga BNS sa mga Day Care Workers ug sa mga Barangay Tanods.

C.MGA PONDO NGA NADAWAT SA LUNGSOD GIKAN SA NASUDNONG MGA AHENSYA UG KAGAMHANAN SA PROBINSYA ALANG SA MGA BARANGAY

Pinaagi sa atong paningkamot ug pakig-alayon sa mga nasudnong ahensya sama sa DILG, DOH, DA, TESDA, DENR, BFAR, DPWH ug sa Provincial Government, ang lungsod sa Trinidad nakadawat og pondo nga nag-kantidad og PhP43,224,999.97 gikan sa tuig 2009 hangtod karong 2015 alang sa:

  1. 1.     Farm to market Road sa Dept. of Agriculture- PhP 19,875,000.00
  2. 2.     Salintubig Project DOH- Php 10,000,000.00
  3. 3.     KALAHI-CIDSS- MCC –DSWD Makamsang Tugon Project- PHP 10,000,000.00
  4. 4.     FMR Poblacion-Kinan-oan ug H.Ilaya FMR gikan ni Gob. Chatto –PHP 1,000,000.00
  5. 5.     Repair of damaged 20 Barangay Halls -Bohol Earthquake Assistance gikan sa DILG- PHP 2,349,999.97

Kong atong sumadahon, ang total nga pondo sa mga proyekto ug programa alang sa Barangay gikan sa Lungsod ug national mikabat na og PHP 63,861,687.97 gikan sa tuig 2009 hangtod 2015.

PONDONG FINANCIAL NGA GIKAN SA LOKAL, PROBINSYAL UG NATIONAL NGA PANGAGAMHANAN ALANG SA PROYEKTONG PANG- INFRASTRAKTURA:

Gikan sa tuig 2008 pipila lang bulan gikan sa akong paglingkod hangtod karong tuiga 2015 , ang lungsod sa Trinidad nakadawat ug naka-pondo na og  PHP 159,984,091.92 nga naglangkob sa construction and concreting of Municipal Streets, Construction of Abbatoir, New Municipal Building, TMC classrooms, Renovation sa Training Center, demo Farm Center, renovation sa daang Munisipyo, Construction and Rehabilitation of Bridges, Construction and Renovation of School Buildings, Barangay Health Stations, Day Care Centers, Improvement of Municipal Health Center, Barangay Electrification Project, Construction of Barangay Gymnasiums, Potable Water System sa Kabarangayan, Rehabilitasyon sa 20 ka Brangay Halls, Construction sa Motor pool, Development sa People’s Park , Farm to Market Roads, Post Harvest Facilities, Agricultural Equipments,Heavy Equipments  ug daghan pang uban nga wala nato matagamtam, madawat ug ma-implemetar sa miaging mga administrasyon.

ALANG SA PAGPANALIPOD SA ATONG KINAIYAHAN:

Alang sa pagtabang sa pagpakonhod sa epekto sa Global warming nga hinungdan sa dagkong katalagman sa atong nasod ug kalibutan, ang Lungsod migahin na og PHP 13,320,678.00 alang sa Greening Program, Ecological Waste Management, Natural Resource Management Project (Upland ug Coastal) ug pagtukod og Residual Containment Area (RCA). Gilusad usab nato ang Basura Ibutang sa Bulsa nga nagtudlo sa mga Kabataan sa insaktong paghipos sa ilang mga basura ug paghatag ug ganti kanila pinaagi sa School supplies. Ang Sticker System nga maoy epektibo nga pag segregate sa basura diha sa mga balay ug mga estbalisimiento nakapamenos sa volume sa basura nga atong gikulikta.

ALANG SA TOURISM DEVELOPMENT:

Ubos sa akong pamunoan, atong gi-develop ang atong Batongay Twin Peak anga nindot na kaayo nga matag karon ug unya pagaduawon sa mga touristang langyaw ug local nga mga magtu-totoo  tungod sa Station of the Cross ug sa Statue of the Our Lady of Fatima. Gi-nindot usab nato ang Kawasan Falls nga mao usab ang gidayo sa mga mahigugmaon sa kinaiyahan. Kining tanan gikan sa 2007 hangtod 2015 ang lungsod nakagahin na og PHP 6, 194,185.00

ALANG SA PAGPANGANDAM UG PAG-DUMALA SA RISGO SA KATALAGMAN (DISASTER RISK REDUCTION AND MANAGEMENT)

Aron nga ang Munisipyo andam nga moa-tubang, motubag ug manalipod sa kinabuhi sa atong mga lumolopyo panahon sa katalagman sama sa, bagyo, linog, sunog ug mga aksidente kita mitukod sa Trinidad Emergency Assistance Team (TREAT) diin kita misangkap niini sa mga rescue equipment sama sa First Aid equipment and Supplies, Water safety equipment, High Angle rescue equipment, Fire Suppression equipment ug Rescue Protective Gears. Apil usab ang pagpalit sa sa rescue van, boom truck ug 10 wheeler truck para sa rescue operation ug evacuation. Trainings and simulations, earthquake and Fire Drills ug uban pa gilusad ngadto sa mga tulonghaan ug mga Barangay. Gilatid usab ang 3 years DRRM Action Plan ug 5 years Climate Change Adaption Plan. Sa kinatibuk-an ang lungsod nakagahin na usab og PHP 4,313,604.00 nga tungod niini gikalipay sa atong mga katawhan ang abtik nag pagresponde sa atong TREAT ilabi na sa disgrasya sa kadalanan.

ATONG AYODA NGADTO SA NATIONAL OFFICES NGA ATONG KAABAG:

Gikan sa tuig 2008 hangtod ning tuiga 2015, ang local nga pangagamhan nakagahin na og PHP 6,334,400.00 alang sa Bureau of Fire Protection, Municipal Circuit Trial Court ug PNP. Karong umaabot nga tuig 2016 segurado na kita alang sa bag-ong 2-storey PNP Building tungod sa pahat sa PNP National ug tugod sa atong counterpart nga PHP 1,000,000.00 alang niini.

SA REVENUE GENERATION UG FISCAL MANAGEMENT:

Sa tuig 2007 ang Total Income sa lungsod –PHP 42,180,119.71

Tuig 2008- PHP 51,489,886.27

Tuig 2009- PHP 58,132,077.30

Tuig 2010- PHP 64,390,195.87

Tuig 2011 –PHP 72,970,457.42

Tuig 2012- PHP 71,711,704.66

Tuig 2013- PHP 83,473,367.68

Tuig 2014- PHP 100,273, 846.91

Ug niining katapusan sa tuig 2015 gipaabot nga modako pa ang atong total Income nga gikan sa Local nga Collection ug sa atong pahat sa Internal Revenue Allotment kon IRA. Gikan sa 4th class nga munisipyo sa 2007 karon 3rd class na kita ug gani mo-qualify na alang sa 2nd nga munisipyo.

Kini ug pipila lang sa  mga kausaban ug kalamboan nga atong nabuhat sulod lamang  sa siyam ka tuig ubos sa Cajes- Gonzales Administration, dul-an sa unom ka tuig sa akong duha ka termino 2007-2010 ug 2013- 2016 ug usa ka termino ni kanhi Congressman ug kanhi Mayor Ondoy Cajes sa mga tuig 2010-2013. Kining tanan atong nahimo tungod sa panalangin sa Dios ug sa tanan nga mitabang ug nahimong kabahin sa atong kalamboan.

Busa tungod niini tugoti ako nga mopasalamat sa  mga National Agencies sama sa DILG thru Secretary Mar Roxas, DSWD thru Sec. Dinky Soliman, DEPed thru Sec. Armin Luistro, TESDA thru Sec. Joel Villanueva, DA/BFAR ni Sec.Proceso Alcala, Department of Health thru Secretary Janette Garin, sa DAR ni Sec. Virgilio delos Reyes, sa NAPC pinaagi ni Chairman Joel Rocamora, sa DOLE pinaagi ni Sec. Rosalinda Baldoz, sa mga Department Heads, sa Sangguniang Bayan pinangulohan ni Vice Mayor Frank Gonzales, sa 20 ka Kapitan nga pinangulohan ni ABC President Atonino G. Cajes, sa Provincial Government nga gidumala sa atong Gobernador Edgar Chatto, Vice Governor Conching Lim,  sa  ug mga Bokal sa mga empleyado sa LGU ang sa tanang katawhan sa lungsod sa Trinidad sa inyong pagsalig ug pagbulig kanako. Daghang salamat ug malipayong pagsaulog sa ika-68 ka tuig nga kasumaran sa lungsod sa Trinidad. Mabuhi ang Trinidad !

header