Home » Message From The Mayor » Message of the Mayor During the Tanod Drill

Message of the Mayor During the Tanod Drill

 

MESSAGE OF THE MAYOR

During the Tanod Drill held at Corazon Aquino People’s Park

August 31, 2013

Akong pagtahod sa atong Bise Mayor, Frank Gonzales, mga sakop sa Sangguniang Bayan, mga Kapitanes, mga bisita ug katawhan’g Trinidadnon, maayong palis kaninyong tanan. Una sa tanan akong dakong pagpasalamat sa inyong pagduyog sa atong mga kalihukan atol sa atong pagsaulog sa ika-66 nga kasumaran sa pagka-lungsod sa Trinidad uban sa tema” Panaghiusa Ipadayon ug Palig-onon aron Dugang Kalamboan atong Maangkon”.

Usa ka spesyal nga pasalamat akong ipadayag ngadto sa atong mga Barangay Tanod sa biente (20) ka Barangay nga akong giisip nga mga bayani tungod sa ilang dakong papel sa pagpatunhay sa kalinaw ug kahusay sa atong mga kabarangayan bisan tuod nga sila nagdawat lamang sa gamay nga honorarium bugti sa ilang makuyaw nga responsibilidad. Busa isip pag-ila sa ilang dakong tampo sa atong lungsod sa Trinidad ato silang gipasidunggan pinaagi niining tinuig nga pasundayag ug indigay nga mao ang Tanod Drill. Atong hatagan sa masipang pakpak ang atong mga Barangay tanod.

 

Gawas nga nalingaw kita sa pag-sud-ong kanila sa ilang mga bayhon atong nabantayan nga sila nag-anam na usab ka-abtik sa pag-execute sa mga commands nga gihatag kanila sa ilang tagsa-tagsa ka mga commandant. Kini nga panagtigi sa kahanas maoy nagsilbing kahimanan nga mapa-angat nato ang kapasidad sa atong mga Tanod.

 

Ako isip inyong mayor kauban sa atong opisyales sa lungsod, mibati ug nakakita sa inyong mga panginahanglan sama sa pagpasaka unta sa inyong mga honorarium ug uban pang mga gamit nga sa pagkakaron wala pa ninyo masinati.

 Among tun-an ang posibilidad nga ang atong munisipyo makahatag ug pundo nga sarang among ika-counterpart sa Barangay aron nga sa bisan gamay nga kantidad atong mapun-an ang inyong gamay nga honorarium.

Moabot ang higayon nga kon kahatagan og katumanan ang atong mga plano para sa atong mga Economic Enterprise sama sa upgrading, rehabilitation and management sa atong potable water system, pagtukod og Municipal memorial park/ cemetery, pagpadako sa TMC, medical center, resorts and recreation venture  ug uban pa nga atong pagasugdan sa anam-anam nga paagi basin nianang higayona ato na gayod nga mahatagan og dugang pundo para sa pagpasaka pohon sa inyong mga honorarium manghinaot lamang kita nga buligan sa labawng’ makagagahum ang atong mga plano.

Sama sa giingon sa atong makahuloganong tema”Panag-hiusa Ipadayon ug Palig-onon aron dugang kalamboan atong Maangkon “. Ako nagatoo nga kini atong makab-ot kong atong ihikling ang atong tagsa-tagsa ka personal nga interes ug atong ipatigbabaw ang interes sa kadaghanan.

Sa makausa pa, malipayong pagsaulog  sa atong ika-66 nga anibersaryo ug daghang salamat sa atong mga Tanod.

 

mayor message - Copy