MAYOR JUDITH CAJES NIDAOG OG AWARD SA CSC-7

20160908_171049_006

Usa ka dakong pasidungog ang nakuha ni Mayor Judith “Bb” Cajes, human siya nidaog sa Region VII sa search for MOST OUTSTANDING PUBLIC  OFFICIALS AND EMPLOYEES 2016, ilawom sa katigoriya sa PAGASA Award nga gipasiugdahan sa Civil Service Commission (CSC). Si Mayor Cajes maoy bugtong mayor nga nidaog sa tibuok rehiyion VII. Gihimo ang Awarding Ceremony sa niaging buwan sa Sityembre 2016, didto sa sugbo, atol sa ika-116 nga kasumaran sa anibersaryo sa Philippine Civil Service.

 

Gawas ni Mayor Cajes, nakadawat usab og pasidungog gikan sa CSC-VII, si Mr. Quirino “Rene” Nugal Jr., Municipal Human Resource Management and Development Officer ning lungsod, isip Most Outstanding Human Resource Management Practitioner sa tibuok rehiyon 7. Naangkon niya ang pasidungog tungod sa maayo ug hapsay niyang pagdumala ug pagpatuman sa mga programa alang sa Human Resource Management sa lungsod.

 

20160908_143337

Tungod sa nakuha nga kadaogan ni Mayor Cajes, malakip siya nga nominee alang sa national level nga Search for Outstanding Public Officials and Employees ning tuig 2016.

 

Sumala sa lagda sa Civil Service Commission (CSC), alang sa ilang Honor Awards Program, mahatag lamang ang PAGASA Award ngadto sa usa ka indibidwal o grupo sa indibidwal kon kini nakahimo og usa ka outstanding nga contribution isip resulta sa pag-umol og ideya o performance nga direktang nakahatag og benepisyo labaw pa kay sa usa ka departamento sa gobiyerno.

20160908_154050

Matod pa sa buhatan sa Civil Service Commission (CSC- rehiyon 7), nga nidaog si Mayor Cajes og PAGASA AWARD tungod sa paghatag niini og kalidad ug barato nga edukasyon ngadto sa iyang mga lumulupyo, pinaagi sa paghimo sa Trinidad Municipal College kon TMC isip usa ka Economic Enterprise. Lakip usab nga gibasehan sa kadaogan ni Mayor Cajes, tungod kay nasuta sa CSC nga ubay-ubay na ang gidaghanon sa mga magtutuon sa TMC nga nakahuman og mga kurso. Ug tungod niini,nag-abli kini og kahigayonan sa mga lumulupyo alang sa ilang kapanginabuhian. Dugang pa niini,nga ang TMC, nakamugna na og malampusong mga nigradwar nga mo-average kini og  282 ka mga magtutuon matag tuig sukad sa 2010. Natabangan usab ni Mayor Cajes ang mga ginikanan nga gikan sa han-ay sa mga mag-uuma ug mangingisda nga makabaton ang ilang mga anak og kalidad nga edukasyon sa ubos lamang nga balayronon aron human sa ilang pagtungha makabaton sila og maayong kapanginabuhian.

 

Giila usab nga dako og gikatampo sa panudlanan sa lungsod ang abot nga kwarta gikan sa TMC. Sukwahi kini sa nahitabo  sa ubang mga tunghaan nga gipanag-iya usab sa LGU lukop rehiyon VII, kay matod pa, ang lungsod mao man hinoon ang niabaga sa mga galastohan sa ilang tunghaan. Nunot ning maong kadaogan, mapasalamaton kaayo si Mayor Cajes ngadto sa kauban niyang mga opisyales, sa tanang empleyado ug sa lumupyo sa padayon niining pagpsuporta sa iyang administrasyon.